Mu rwego rwo kwagura ivugabutumwa no gukomeza gusigasira ingingo z’itorero rya ADEPR, kuri uyu wa 23 Ukuboza 2017, itOrEro rya ADEPR mururembo rw’umugi wa Kigali ,muri Paruwasi ya Ruyaga bakoze ibiroli bikomeye birimo gusengera abavugabutumwa 4 n’abadiyakoni 52 hanakirwa abizera bashya bagera ku 126 barimo 111 babatijwe mu mazi menshi n’abandi 15 bakiriwe mw’itorero rya ADEPR, ibi bikorwa byakurikiwe n’umuhango wo gusezeranya imiryango 13 yari isanzwe ibana ariko idasezeranye mu itorero.

Ibi biroli byitabiriwe n’abayobozi ba ADEPR ku nzego zitandukanye 

Ibi biroli byitabiriwe n’imbaga y’abakristo bo muri ADEPR Ruyaga baturuka mu midugudu 7 iyigize ,hari kandi abakozi b’Imana batandukanye barimo abakuru b’itorero n’abavugabutumwa bakorera muri iyi Paruwasi ndetse hari n’ubuyobozi bw’ururembo rw’umugi wa Kigali bwari buhagarariwe na Rev.Muntu Benjamin umushumba wungirije muri uru rurembo hari kandi Rev.Akoyiremeye Pierre Claver umushumba wa ADEPR mu karere ka Kicukiro wanakiriwe bwa mbere muri iyi Paruwasi kuko aribwo bwa mbere yarayigezemo aho aziye gukorera muri aka karere.

Uyu muhango wayobowe na Karasira Slivestre umushumba wa ADEPR Paruwasi ya Ruyaga ari nawe wasezeranije ku mugaragaro iyi miryango iyi miryango 13, agasaba buri wese kunyurwa n’uwo bashyingiranwe kuko aricyo kizatuma bubaka urugo rw’umugisha.

Yaba imiryango yasezeranye ndetse n’abizera bashya babatijwe mu mazi menshi bose hamwe baturuka mu midugudu 7 igize paruwasi ya ADEPR Ruyaga. Ni igikorwa cyari cyahagurukije n’iyonka muri ibi birori by’imboneka rimwe umuntu wese atabura kwishimira.

Rev.Karasira umushumba wa ADEPR Paruwasi ya Ruyaga 

Umushumba wa Paruwasi ya ADEPR Ruyaga , mu kiganiro n’ikinyamakuru IYOBOKAMANA.COM, yavuze ko bishimira cyane umusaruro wavuye mu ivugabutumwa bakoze mu ma centre 8 agize agace bakoreramo kugeza aho babashije kubatiza abagera kuri 206 muri uyu mwaka wa 2017 kuko mu gihembwe cya mbere nyuma y’iryo vugabutumwa twabatije 80 none uyu munsi twabatije abandi 126 baturutse muri iyi paruwasi ndetse no gusezeranya imiryango 13 yabanaga mu buryo bunyuranije n’amategeko y’itorero.

Ati:”Nukuri turashima Imana cyane yabanye n’itorero rya ADEPR Ruyaga muri uyu mwaka wa 2017 kuko umusaruro w’ivugabutumwa ababatijwe muri uyu mwaka wose bagera kuri 251 none habayeho n’igikorwa cyo gusezerana kw’aba babanaga mu buryo butemewe n’amategeko kuko itorero twarabasanze turabibashishikariza bemera gusezerana imbere y’amategeko ya Leta n’imbere y’Imana kandi itorero twihaye ingamba ko mu mwaka wa 2018 byibuze tuzabatiza abantu basaga 500 ndetse n’imiryango yose yaba ibana itarasezeranye muri Paruwasi ya Ruyaga ikazasezerana “.

Rev. Muntu Benjamin umushumba w’ururembo rw’umugi wa Kigali wungirije yari muri ibi biroli

Rev. Muntu Benjamin umushumba w’ururembo rw’umugi wa Kigali wungirije ari nawe ushinzwe ubuzima bw’itorero, mw’ijambo yagejeje kubitabiriye iki gikorwa yagarutse kuri gahunda itorero rya ADEPR rifite yo kubaka umukristo uhamye kandi utanga ikizere cy’ejo hazaza haba ku itorero ndetse no ku gihugu, aboneraho umwanya wo gusaba abashyingiwe kunyurwa n’abafasha babo kuko aribyo bizakomeza kubafasha kubaka ingo z’umugisha bikabarinda amakimbirane n’isenyuka ry’ingo rya hato na hato, bityo bakaba bubahirije inshingano nk’abakristo.

Mu gihe abanyarwanda bitegura kwinjira mu mwaka mushya wa 2018 ubuyobozi bwa ADEPR mu rurembo rw’umugi wa Kigali , by’umwihariko muri Paruwasi ya Ruyaga burifuriza abanyarwana muri rusange kuzagira iminsi mikuru myiza, birinda gusesagura no gusayisha mu byaha, ahubwo bagafatanya n’abandi gushimira Imana ikibatije ubugingo.

Rev.Akoyiremeye Pierre Claver umushumba wa ADEPR mu karere ka Kicukiro yari muri ibi biroli anakirwa bwa mbere muri iyi Paruwasi ya Ruyaga


Habatijwe abasaga 111 hanakirwa abandi 15





Abayobozi ba ADEPR muri Paruwasi ya Ruyaga ,uwa akarere ka Kicukiro n’uwururembo wungirije bitabiriye uyu muhango 









Byari ibiroli bikomeye kandi byitabiriwe cyane mu muhango wo kubatiza abasaga 111 no gusengera abavugabutumwa bane no gushyingira imiryango 13

Kuri iki cyumweru tariki ya 31 Ukuboza 2017,ibitaro Bikuru bya Kibungo byatangije ku mugaragaro Siporo rusange y’abaturage bose by’umwihariko baturiye akarere ka Ngoma ibi bitaro bikoreramo.Ni igikorwa cyitabiriwe n’abayobozi batandukanye barimo Meya w’akarere ka Ngoma   Bwana NAMBAJE Aphrodise,abahagarariye Ingabo na polisi, ndetse n’Umuyobozi Mukuru w’ibitaro Bikuru bya Kibungo Dr.Namanya William.

Dr Namanya mu myitozo

Ni igikorwa cyatangiye saa kumi n’ebyiri za mu gitondo  abayitabiriye bakaba bahagurukiye ku bitaro Bikuru bya Kibungo berekeza kuri stade ya Cyasemakamba.Ibi bitaro kandi byapimye abaturage  indwara zitandukanye zitandura ku buntu zirimo Diyabete,umuvuduko w’amaraso,indwara z’amaso,gupima uburebure n’ibiro,imirire,umutima n’izindi.

Mu ijambo rye Dr Namanya William uyobora ibitaro bikuru bya Kibungo  yabwiye abitabiriye ko iki gikorwa babitejereje mu rwego rwo kubungabunga ubuzima bw’abaturage ndetse no kubakangurira umuco wo gukora siporo nka kimwe mu birinda umubiri indwara zitandura (Non Communicable Diseases).Dr Namanya yavuze ko bazakomeza iyi gahunda ya siporo rusange ari nako baharanira ko ubuzima bw’Abanyarwanda bukomeza kuba bwiza.Yongeyeho babonye ari ibyagaciro kurangiza umwaka abaturage baziko uko ubuzima bwabo buhagaze.

Dr Namanya William wa Kibungo Referral asobanura impamvu ya siporo no gusuma ku buntu

Bwana Nambaje Aphrodise,Umuyobozi w’akarere  ka Ngoma ibi bitaro bikoreramo ,yashyimiye cyane ubwitabire bw’abaturage muri iyi siporo anizeza ibitaro bikuru bya Kibungo ko akarere kiteguye gufatanya nabo muri gahunda zose zigamije gutuma abaturage bagira ubuzima bwiza.Yasobanuye ko ntawe ukwiye gusiba siporo rusange nk’izi ngo kuko ari umuti uvura indwara zitandukanye.

Umuyobozi w’ingabo Col Jomba Gakumba mu myitozo 

Mu bindi  byagarutsweho ni ibiyobyabwenge bimaze kworeka imbaga nyamwinshi mu rubyiruko ,inzego za polisi n’iza Gisirikare muri aka karere zavuze ko bikwiye gucika burundu kandi ubikoresha wese akwiye kubireka .

Ibikorwa bya siporo rusange bizakomeza muri aka karere  ,ari nako hatapimwa indwara zitanduza.Mu bipimo biheruka bitangwa n’ibitaro bya Kibungo bigaragaza ko indwara zitandura ziri kugenda zizamuka bityo ingamba nk’izi zikaba zigamije guhashya izi ndwara.

 Andi mafoto

Umuyobozi w’ingabo mu myitozo Col Jomba Gakumba

Dr Namanya mu myitozo

Ubwo Dr Apostle Paul Gitwaza yigishaga mu makesha yo gusoza umwaka wa 2017 mu ijoro ryakeye ryo kuri 31/12/2017 kugeza mu gitondo cyo kuri iyi taliki ya 1/1/2018 ku itorero Zion Temple Celebration Center nibwo yatangaje ibintu 12 bizagaragara muri uyu mwaka wa 2018 yabwiwe n’Imana ndetse anatangaza uko bise uyu mwaka

Kanda hano wumve Zion Temple:Umuriro ugiye kwaka, Bishop Dieudonne avuga ko Gitwaza nta burenganzira afite bwo kumwirukana

Ibintu 12 Apostle Paul Gitwaza yatangaje bigaragara mu irembo ry’Ibyiringiro muri uyu mwaka wa 2018 abantu bazabona : 1. Kugirirwa neza n’Imana yeremiya 29:11 (muri uyu mwaka hari ukugirirwa neza n’Imana uzabona ), 2. Kwicarana kugendana n’abakomeye ( uyu mwaka uzabibona ntiwisuzugure uzabibona ugiye kwakirwa n’abantu bakomeye) 1Samweri 2:8-9, 3. Imiryango yafunzwe izakinguka(gukingurirwa Imiryango yawe yose yakinzwe( ibyahishuwe 3:8), 4. Guhozwa Amarira zaburi 116:8-14, 5. Ubwenge budasanzwe, 6. Gukuzwa no guheshwa agaciro (niba wifuza guhabwa agaciro ubahiriza igihe Imana irazamura agaciro kawe) , 7. kurindwa impande zose, 8. gushumbushwa ibyo wanyazwe, 9. Guturwa imitwaro yakuremereye, 10. kwagurirwa imbago, 11. kwiturwa ineza wakoze, 12. kumarwa ubukene waciyemo bw’iwanyu.

Uyu mwaka wa 2018 Apostle Paul Gitwaza yawise umwaka wo kwinjira mu irembo ry’ibyiringiro

Dore ubutumwa Dr Apostle Paul Gitwaza yanyujije kurukuta rwe rwa Facebook : “Imana igiye kutwinjiza mu Irembo ry’Ibyiringiro muri uyu mwaka mushya dutangiye.

Kubw’uyu mwaka wa 2018 twahawe ihishurirwa, ko ari umwaka Imana igiye gukora ibintu bitandukanye biduhesha ibyiringiro. 2018: “ Irembo ry’Ibyiringiro” Hoseya 2:17: Avuyeyo nzamukomorera inzabibu ze, kandi igikombe cya Akori kizamubera irembo ry’ibyiringiro, kandi azaharirimbira nko mu gihe cy’ubukumi bwe, nko mu gihe yazamukaga ava mu gihugu cya Egiputa.”

Inkuru ya agakiza.com

Umuhanzi KALIMBIRO AJABU  wamamaye cyane mu bikorwa by’Ivugabutumwa doreko ari Paster mu itorero rya News Creation riherereye ikabuga mu mujyi wa Kigali ‘ akaba kandi ari umwe mu itsinda “The Blessed Brothers” rikaba rizwi cyane mu indirimbo ITERAMBERE

Nyuma yuko abisabwe n’abanyarwanda batari bake  byumwihariko abakristo batandukanye  Paster KALIMBIRO AJABU   yamaze gushyira hanze indirimbo nshya yise ‘NTACYO UTAKOZE’ avugako ikubiyemo ishimwe ry’imyaka yujuje.

Ubwo ya ganiraga  n’ Umunyamakuru w’ Ubumwe.com Paster KALIMBIRO AJABU   mu ijambo rye yagize ati:” Nakoze indirimbo yo gushimira Imana kubw”imyaka 29 Maze mvutse kandi nujuje uyu munsi , iyo ndirimbo yitwa NTACYO UTAKOZE ikaba ifite na video yayo yasohotse gusa zimwe mu ngamba mfite nuko ngiye gukorana umurava muri muzika , mbifatanije no kuba umu pastor kandi nziko nzabishobozwa  n’ Imana , turatekereza kandi ko uyu mwaka tuza kora lounch ya album ya “The Blessed Brothers”  tukaba kandi tuzategura n’ibitaramo.

Abajijwe  aho bakomora ibihangano  yasubije agira ati:” isoko y’ ibihangano byacu ni mw’ ijambo ry’ Imana, hari igihe inspiration ituruka mu buzima busanzwe umuntu acamo, jye rero ibyo iyo bimbayeho binsigira indirimbo ku mutima wanjye !!, harinigihe ndota ndirimba nkabyuka nyandika.

Yasoje atanga Inama kubanyarwanda bose muri rusange aho yagize ati;” kubakunzi bacu nabasaba ko bakomeza kudusengera kandi bakana tuba hafi muri byose, naho ku banyarwanda muri rusange ndabakunda kandi bashyigikire abaririmbyi baririmba indirimbo z’ Imana mu rwego rwo kubaka ubwami bw’ Imana.

Nd.Bienvenu

Ku nshuro ya kabiri itsinda Jesus Walkers ry`urubyiruko rw`abakristo ribarizwa mu mashuri makuru ryateguye igitaramo cyo gushima Imana kizitabirwa n`abahanzi barimo Serge Iyamuremye, Healing Worship Team n`abandi, kikazabera I Remera kuri itorero Healing Centre tariki ya 5 Mutarama 2017 guhera ku isaha ya saa cyanda n’igice z’amanywa(3.30 PM).

Healing Worship Team nayo izaba yabukereye muri iki giterane

Nk`uko bitangazwa na MUHIRE  umuyobozi w`iri tsinda, intego yabo ni ugushima Imana  ndetse bakabikora banabwirize urubyiruk o ngo bahindukirire Kristo; “ Intego nyamukuru ni ugushima Imana ariko kandi tunabwiriza urubyiruko bagenzi bacu ngo bahinduke bakizwe, niyo mpamvu buri mwaka dutumira umwigisha umenyeranye n`urubyiruko kuri iyi nshuro tukazakorana na Cleophas BARORE umushumba akanaba umunyamakuru kuri Televison y`igihugu.”

Iki gitaramo gifite insanganyamatsiko igira iti “Wabanye Natwe” gisanzwe kitabirwa n`urubyiruko rwinshi dore ko umwaka ushize kitabiriwe n`abasaga 400, bagafatanya gushima Imana, kuri iyi nshuro Jwalkers ikaba itangaza ko abazitabira igitaramo cyabo bazanyurwa n`imitegurire yacyo ndetse n`ubutumwa buzahatangirwa.

Umuhanzi Serge Iyamuremye azitabira iki gitaramo

Iki ni igitaramo ngarukamwaka mu rwego rwo kurushaho gushima Imana a:” Iki gitaramo ni icyo gushima Imana iba yaraturinze mu mwaka utambutse akaba ari nayo mpamvu kigomba kuba mu kwa mbere buri mwaka, ahanini tugashima Imana ariko kandi tukanaganira ku ijambo ry`Imana.”

Iki gitaramo kigiye kuba ku nshuro yacyo ya kabiri kizaba kuri uyu wa gatanu tariki ya 05 Mutarama 2018 guhera I saa cyenda n`igice z`umugoroba kikazitabirwa n`abahanzi banyuranye barimo Serge IYAMUREMYE, Arsene TUYI, Healing Worship Team ndetse na Pastor Cleophas BARORE kikazabera I Remera mu itorero rya Healing Center.

Itorero rya Zeraphath Holy Church riyobowe n’umukozi w’Imana Bishop Harerimana Jean Bosco umaze kumenyekana mu gukoreshwa n’Imana imirimo n’ibitangaza riteguye igiterane k’imbaraga kizabera mu mugi wa Kigali mu karere ka Nyarugenge mu murenge wa Nyamirambo aho mur’icyo giterane hatumiwemo Pastor Emma Ntambara nawe ukoreshwa n’Imana mu gukiza abarwayi indwara zananiranye.

Iki giterane cy’ibitangaza no kubohoka kizatangira kuva kuwa kane w’italiki ya 18 kugera ku cyumweru taliki ya 21 Mutarama 2018 kikazabera kuri Salle yitwa Igihozo, iherereye hafi y’umurenge wa Nyamirambo muri Centre ya Miduha, aho imodoka zitwara abagenzi zikatira .

Ibiterane uyu mukozi w’Imana Bishop Harerimana Jean Bosco ategura bijya bibera ababyitabira nk’imvura y’imigisha n’ibitangaza kuko barahembuka bikomeye, bamwe bakakira agakiza ,abandi bagakira indwara zitandukanye kandi zikomeye z’umubiri n’izituruka ku myuka mibi ari no muri ubwo buryo bitewe nuko iri torero ashumbye rifite ikicaro mu mugi wa Rubavu yagiye asabwa n’abantu benshi bo mu mugi wa Kigali ko yabategurira igiterane nawe arabyemera ari nabyo agiye gushyira mu bikorwa mu ntangiriro z’uyu mwaka wa 2018 .

Bishop Harerimana Jean Bosco , Umuyobozi w’iri torero rya Zeraphath Holy Church yabwiye ISANGE.COM ko bateguye iki giterane mu rwego rwo gukomeza kwamamaza izina rya Yesu mu batamuzi ndetse no kwerekana ubushobozi n’ububasha buri muri kristo Yesu kuko ashobora gukiza indwara agakora imirimo n’ibitangaza bikomeye nkuko yabikoraga na kera.

Yagize ati,”Imbaraga za Yesu ntaho zagiye ziracyakora ibitangaza ” niyo ntego y’iki giterane, aho tuzaba tubwira abantu imbaraga ziboneka mu kwizera Imana bityo turahamagarira abantu kuzaza kureba uburyo Yesu agira neza kandi ko muriwe hakorekeramo ibitangaza ikoresheje abakozi bayo” .

Uyu mukozi w’Imana yakomeje avugako muri iki giterane yatumiyemo abakozi b’Imana batandukanye kandi nabo buje ijambo ribohora banakoreshwa n’Imana barimo Pastor Emma Ntambara, umushumba w’itorero urufatiro rwa Kristo nawe umaze kuba ikimenyabose mu gukoreshwa ibitangaza ndetse kizanabonekamo n’undi mukozi w’Imana w’umuhanuzi witwa Prophete Claude umushumba w’itorero rya Soul Healing .

Bishop Harerimana Jean Bosco amavuta ye agiye guhura n’aya Pastor Emma Ntambara bombi bazwiho gukoreshwa n’Imana ibikomeye

Muri iki giterane si abakozi b’Imana babwiriza ijambo gusa ahubwo kizanitabirwa n’amatsinda n’abahanzi batandukanye barimo itsinda rya Gisubizo Ministries ,Kingdom Worship Team ndetse n’abahanzi nka Mama Pasteur Grace Ntambara ,Bikorimana Emmanuel (Bikem) na Gikundiro Rehema hamwe n’umuhanzi ukunzwe na benshi ariwe Bigizi Gentil .

Prophet claude Ndahimana Umushumba mukuru w’itorero Soul Healing Revival Church nawe azaba ari muri iki giterane

Pastor Emma Ntambara nawe azaboneka muri iki giterane 




Amatsinda n’abahanzi batandukanye bakereye iki giterane

Hashize amazi agiye gukabakaba 6, Mukansanga Theodette, umufasha wa Habyarimana Juvenal, utuye mu kagari Bweramvura murenge wa Jabana, ho mu karere ka Gasabo mu mujyi wa Kigali, amaze amezi asaga 3 asinziriye mu bitaro bya kaminuza bya Kigali CHUK, kubera ikibazo yagize ubwo yajyaga kwa muganga agiye kubyarira ku bitaro bya Kibagabaga ariko kuva mu kwezi kwa munani ngo bamutera ikinya na nubu ntarakanguka nk’uko umugabo we abitangaza.

Mukansanga Theodette agiye kumara amezi atandatu asinziririye mu bitaro bya Kigali CHUK kubwo ikinya yatewe

Nubwo habayeho iki kibazo uyu muryango n’ubundi ukomeza uvuga ko kubera ibintu bisa nk’ibyabagwiririye cyane ko batazi n’igihe uyu mugore azavira muri iki kinya basaba ubufasha ko umuntu ufite umutima wo gufasha wese byaba kubasura ndetse no kubafasha mu buryo bw’amikoro ko yabageraho.

Habyarimana Juvénal, umugabo wa Mukansanga umaze amezi hafi atanu asinziriye muri CHUK kubera ikinya yatewe abyara

Habyarimana Juvenal, asobanura ikibazo cy’umuryango we muri aya magambo:” Mu by’ukuri umuryango wanjye wagwiririwe n’ibyago bikomeye ubu ndwaje umugore umaze amazi hafi atandatu asinzirijwe n’ikinya yatewe ,ubu amafaranga y’ibitaro amaze kuba umurengera mu gihe kandi mu rugo hari abana batanu nabo bari kwicwa n’inzara ,ni ukuri ndasaba abagiraneza ko bamfasha kuko ndaremerewe.

Umuganga kandi kuri ubu uri mu itsinda ry’abakurikirana ubuzima bw’uyu mubyeyi, ashimangira ko bari kumwitaho uko bishoboka avuga ko byose biri mu kiganza cy’Imana, kuko ngo nabo batahamya igihe azakangukira. Umuyobozi w’Ibitaro bya CHUK, Dr Hategekimana Théobald, yabwiye igihe ko Habyarimana aba akeneye ubufasha.

Yagize ati “Ibijyanye n’ubufasha twifashisha abantu b’abagiraneza ariko ibyo kurya nibo babizana nyine kuko potage nibaza ko abantu bose bafite akarima k’igikoni, bagerageza bakajya bayimuzanira ariko nka za pampers twebwe twareba niba hari nk’abantu b’abagiraneza bashobora kudufasha bakajya bazimushakira.”

Uyu muryango uvuga ko mugihe hagize uwagira uwagira ubufasha ngo yagana kwa muganga mu bitaro bya kaminuza bya Kigali CHUK aho barwariye cyangwa agahamagara kuri numero ya Telephone ya Habyarimana Juvenal ari nawe utabaza ariyo +2502837204

Mbanje gushimira Imana impaye uyu mwanya kandi ndayinginga ngo umwuka wera anshoboze kuvuga ibikwiriye mu izina rya Yesu, Amen. Ijambo rijyanye n’ubuhamya bwanjye : 1 Tes 5.24 “Ibahamagara ni iyo kwizerwa, no kubikora izabikora.”

Ubuhamya: Iyumvire impamvu abana b’Abapasiteri usanga bigira ibyigenge bakajya mu byaha, Ubuhamya bwa Ev. KWIZERA Emmanuel

Reka mbanze mbibwire :
Nitwa Consolée NIYIGABA, nkaba ndi mwene Simon KABERUKA na Marthe MUKANGWENE, navutse mu 1976 mu gihugu cy’u Rwanda, mu karere ka Nyamasheke, umurenge wa Kanjongo, akagari ka Kibogora.

Nize amashuri abanza 1982-1990, twigaga imyaka 8, naho amashuri yisumbuye GSFAK kuva 1990-1994, 2003-2005, hanyuma kaminuza nyiga mu cyahoze cyitwa KHI (Ubu ni UR-CMHS) 2009-2011.
Nabaye umuforomokazi ku bitaro by’i Kibogora imyaka 3, ubu mpari ndi umu anesthesiste maze imyaka 4.

Ndubatse mfite umugabo n’abana 5, umuhungu 1 n’abakobwa 4. Nk’uko nabibabwiye navukiye muri uriya muryango, kandi bari abakristo bombi bo muri Methodiste, bombi bari abaforomo, murumva ko imibereho ntacyo yari itwaye.

Badutozaga gusenga, kujya muri Ecole de Dimanche, ubwo rero njye numvaga ko ibyo bihagije ngo nzajye mu ijuru, ariko buri gihe nkarota impanda yavuze ngasigara, mbanza gutekereza ko ari uko ntari umu Pentecote.

Ariko kuko nari nturanye nabo kandi mbakunda cyane nkajya mbegera, bakanyigisha gusenga. Igihe kimwe negereye ababyeyi banjye baganira numva bavuga ukuntu abakobwa iyo bashyingiwe ari isugi bahesha Imana icyubahiro kandi ababyeyi bagahabwa agashimo (Niko umuco wari umeze icyo gihe). Icyo cyifuzo nacyo nahise ngishyira ku bindi, hamwe no gutsinda ikizami cya Leta.
Ndangije umwaka wa munani natsinze ikizamini, icyo gihe ntibyari byoroshye gutsinda ariko nakomeje kurota za nzozi nkajya mbaza Imana impamvu, kuko nabonaga nta byaha biremereye.

Nagiye kwiga i Kirinda (Mu ishuri ry’ubuforomo), amezi abiri, mbona transfer ngaruka iwacu (EAM) Ecole des assistant medicaux niko ryitwaga, nasanze hari abahungu 180, abakobwa turi 20.

Aho rero twari udukumi tumeze neza, naranzwe n’ubwibone bwo mu rwego rwo hejuru, iyo umuntu yabaga afite icyo twitaga pistolet (ama tailles) ubundi agasokoza le coque yumvaga isi ari iye, uko niko nari meze.

Nagiraga urwango kubi, nagiraga ishyari cyane, gusa nubwo byari bimeze gutyo, nari umuririmbyi, ngakunda no gusoma Bible ndi ahantu bose bandeba, ubundi si ukunyogeza ngo dore umuntu w’Imana ! Ibyo bikanshimisha cyane, ariko za nzozi zanga gushira.

Muri icyo kigo haje kuza kwiga umukobwa uvuye i Kigali w’umurokore witwaga MUKARUSANGA Florence. N’ubwa mbere twari twumvise iryo jambo, ahageze naramwanze ku buryo ntari no kumusuhuza, kuko nabonaga atwaye icyubahiro cyanjye, niwe batangiye kujya bavugaho, njye sinashoboraga no kumusuhuza, ariko yaje kujya anyikundishaho birangira angejeje kuri Yesu mu 1992 Imana imumpere umugisha.

Kuko nari narabatijwe ku gahanga nahise mbatizwa mu mazi menshi, mu minsi mike mbatizwa mu Mwuka wera nari nkiri muri Methodiste, Imana ihita imbuza gusuka imisatsi, naho ya matailles yagiye ashira buhoro buhoro sinamenye aho yarengeye, ubundi impa amasezerano harimo iri ngo NZAKWAMBIKA AGASHEMA (agatimba) ; iri sezerano ryambijije icyuya ! (Ndaza kubigarukaho hasi).

Hari isomo Imana yanyigishije nkiri aho muri EAM, ubundi nari umuhanga, ariko nza kwibwira igihe kimwe ndi mu bizamini ngo uwaba mpagaritse amasengesho no kujya muri korali ; ubwo nabaga uwa 3, noneho naba uwa 1. Narabikoze, igihembwe kirangiye nsanga nabaye uwa 12 n’amanota make cyane, Imana itwigishe.

Hanyuma jenocide yakorewe Abatutsi yabaye niga mu mwaka wa 4, twebwe twatangiriraga section mu mwaka wa 1, noneho iri kurangira wabonaga ko umutekano ari muke aho twari dutuye bitewe n’uko abantu bicaga abandi bicanyi. Mbona ko abantu bariho bahunga, nabajije Imana, impa amagambo abiri Itangiriro 28.15 “Dore ndi kumwe nawe, nzakurindira aho uzajya hose kandi nzakugarura muri iki gihugu… No muri Yesaya 48.10 “Dore ndagutunganije ariko si nk’ifeza nkugeragereje mu ruganda rwo kubabazwa.”

Twabiganiriye no mu rugo, tuba turagiye duhungira muri RDC (Icyahoze ari Zaïre), ariko ngambirira nka Daniyeli kutaziyandurisha ibyo muri icyo gihugu twari duhungiyemo. Imana yahise iduha aho kuba ku itorero ryaho (ku rusengero).
Tuba mu nzu y’igorofa (etage), mbona ni byiza, nkumva nko mu kwezi gutaha tuzataha.

Irindi somo Imana yahise inyigisha : habayeho gushaka abakozi bajya gukora igiforomo, barangije A2 naho baba barataye ibyangombwa, abantu benshi barabeshye ko barangije, n’abo twiganye bose babona akazi bahembwa ama dollars menshi, bavuga ko njye nta bwenge ngira, ariko n’ukubera umuhigo nari narahize wo kutaziyanduza. Njye nisabiye stage kugira ngo ntazibagirwa ibyo nize, hanyuma igabanywa ry’bakozi rigeze jyewe Manager arampamagara yari umuzungukazi arambwira ngo yakunze uko nkora arashaka ko mba umukozi w’ibyo bitaro, abwira uwari ushinzwe abakozi ngo kugira ngo bidatera umwuka mubi azajye anzanira umushahara (salaire) wanjye, ndeke kujya njya gutonda umurongo hamwe n’abandi ! Imana iteye ubwoba !

Twagiye gusenga muri groupe imwe ntoya, Imana iratubwira ngo bamwe muri mwe ngiye kubatuma kuvuga ubutumwa i Burega. Numvaga ko njye ndi muto muri bo, ko bitandeba, gusa abo Barega ni abantu bagira ikigirwamana baramya, bubaha cyane, ndetse n’abasenga Imana bamwe ndetse benshi baragitinyaga, ni ahantu bakunda abagore mu rwego rwo hejuru ku buryo umugore ateretera umugabo we.

Sinavuze ko twaje kujya mu nkambi,kuko papa yari abonyeyo akazi, aho hantu ubuzima bwari ukurya, kuryama, gushyingirwa ntawundi mushinga, aho rero nanjye nabazwaga cyane ibyo gushinga urugo, hari benshi bansabaga urukundo bifuza ko twabana ariko numvaga bitandimo, bituma mfatwa nk’umukobwa ubenga cyane, ariko hari n’aho nabazaga Imana mbona uwo musore yubaha Imana, Imana ikampakanira. Kandi koko hari babiri Imana yambujije : ubu bose ntibakiriho, umwe yakijijwe ariko yararwaye SIDA atabizi.

Reka nihute cyane, ibintu byaje kuba bibi mu makambi tuvamo, naje kwisanga ngeze muri ya zone y’Abarega, mpita nibuka ibyo Imana yavuze, ntangira kuvuga ubutumwa pe. Mu minsi mike kubera ibintu by’intambara bihora muri RD Congo, naje gutakara mu ishyamba ndi kumwe na gasaza kanjye gato, gusa aho nahasanze abandi banyarwanda nk’icumi, aho rero insoresore zarahadusanze ziti turashaka abagore ariko cyane cyane uyu (ariwe njyewe) bamwe barabyemeye mba arinjye njyenyine nsigara, nasenze isengesho rivuga ngo : “Yesu we, mbabarira untabare kandi nutantabara, aba bantu bakansambanya, ntabwo nzajya kubyihana, ubwo ni wowe uzajya kubivuga.

Bafashe inkoni barankubita bya bindi by’intangarugero, barambiwe kunkubita, baranshoreye ngo njye gupfa kandi aho bari banjyanye nari mpazi koko kwari ugupfa, ariko nahise nuzura Umwuka wera ndanezerwa ntekereza ukuntu abamalayika baza kunsanganira numva nkunze gupfa pe, baranshoreye ngenda ndirimba, mu kanya ndebye inyuma mbona bari kwiruka basubira inyuma, Yesu aba arantabaye yo gahora ku ngoma !

Ubwo rero natangiye kuzerera mu ishyamba, nza kugera aho abantu baba nyuma y’iminsi ibiri, nta gakweto, nambaye ikanzu n’ijipo, twaryaga ubunyobwa kuko ababyeyi buri gihe badushyiriraga ubunyobwa mu mifuka, tugahekenya n’imyumati (aho hantu biremewe ko ushonje wakura umwumbati mu murima ukawurya).
Dore ngo ndagera ku ga centre abagabo ngo bitomboreye umugore, gusa shenge bagira umutima mwiza kandi beza imyaka mu murima cyane, ubwo rero abagore bose b’aho buri umwe ati urararana n’umugabo wanjye, ndumirwa pe, bakancumbikira iminsi 2, nakwanga bakansezerera.

Biranyobera, ariko nkomeza kwegera Imana mu mubabaro uryana nk’igisebe, mbibutse ko nari kumwe gusa na gasaza kanjye gato, cyakora naje kugera ku ga centre kamwe nsanga umugore ari kunda ndamubyaza barishima, mbabwira ko ndi umubikira w’aba protestant barancumbikira.

Naho naje kuhaburira umutekano nza kwinginga umugore umwe ngo anjyane ahandi hantu, duhaguruka 6h00’ bigeze 12h00’, ati reka ngushyire uhakugeza neza, anshyira umugabo we wacukuraga zahabu, twaragenze mu ishyamba rinini cyane nta bantu tunahura, hanyuma ati mpemba (avec precision ko ashaka ko dusambana) nari naniwe cyane mpita mvuga nti Yesu we ! Nshatse kwiruka anyuzamo umutego nitura hasi. Twahise twumva abantu baganira baza badusanga, kandi ubwo hari nka saa kumi n’ebyiri z’umugoroba (18h00’), yahise yiruka n’umwenda yari amaze kwambura yarawutaye, nategereje babantu ndababura sinongera no kubumva, ndumirwa “Uzi kurinda Yesu we !”

Reka nsimbuke ni byinshi ndi kubura ibyo mvuga n’ibyo ndeka, reka mbabwire uko nubatse urugo : Zaburi 105.19 “Kugeza aho ijambo ry’Uwiteka ryasohoreye, Isezerano rye ryaramugeragezaga.”

Ubwo namaze umwaka ntarongera kubona undi muntu wo mu muryango wanjye, ubwo muri gutekereza uko ubuzima bwari bumeze ! Gusa twaje kuzabonana na Mama hari umupasteur utujyanye, nsanga we aba ahantu hari iterambere byibura kuko hari hari ibitaro, amashuri, aba missionaries, ariko nahageze nararembye, mfite amaraso make (Hg ya 5g/dl) abakora kwa muganga murabyumva ko narinkeneye transfusion (kongererwa amaraso), ariko Uwiteka yanshyizeho igikundiro aho hantu, abantu benshi baho, barankunda cyane banyitaho baramvura ndakira nari nararwariyemo na Malariya, Imana irandinda ntiyanyica.

Ubwo rero aho niho nakomereje ubutumwa, mpimba indirimbo muri swahili, ngasaba umwanya mu materaniro nkaririrmba, nkabona abantu bafashijwe, aho niho nakiriwe muri Pentecote y’aho, hanyuma rero kuko bari bamaze kunyondora akabiri karagarutse, abashaka ko turushinga baba baratangiye, aho hantu rero ntabwo bashyingirwaga mu rusengero, barakwaga bagahita bajya mu rwabo, ngo abagerageje, babasengeraga mu rugo, ariko muribuka (hejuru ntangira ubu buhamya) nababwiye ko Imana yambwiye ko nzambara agashema (agatimba), abanyarwandakazi benshi bari baraho bafashe umwanzuro wo gushaka, mbona abo mu kigero cyanjye ninjye usigaye, nagize ubwoba pe, bari barampimbye “apana” bivuga ngo “oya”, (Mu yandi magambo byasobanuraga) umukobwa ubenga cyane, ngo nzumirwa, bavuga amagambo menshi ngo nshobora kuba ntari muzima, bituma ngira ubwoba pe.

Ndavuga ngo reka mbaze Imana. Ariko bankundaga se ndi uwuhe ko nagendeshaga ibirenge, namesaga nijoro, twabeshwagaho n’uko najyaga guhingira abarega bakampemba 80frw ku munsi, ariko disi ubu mbabwire, nkunda abakozi bo mu rugo no mu murima cyane, kuko iyo nabaga ndi guhinga nkumva bari koza amasahani nahitaga nsaba Imana ngo imbabarire ntibanyime, nkabona barampamagaye ngo nze dusangire, nkishima nkabyina.

Ubwo udufaranga twaje kugwira ncuruza amavuta, mpita ngura kambambiri zacu twese mu rugo, wari umunsi mukuru, ngiye kugura igitenge kirimo bitatu baribeshya bampa imirimo 9, ijwi rimwe rikambwira ngo ni umugisha wawe, irindi ngo uribye, hashize iminsi 2 ndagiterura ngisubizayo, bavuza induru barumirwa nti ntabwo ari jye n’ukubera “Yesu”, njye sinari kukigarura.

Nkurikije ubwo buzima navuze n’ubundi ntavuze nanyuzemo numvaga buriya Yesu azampa umugabo w’umurokore ariko w’umukire, ufite imodoka, ibipangu, n’ibindi nk’ibyo (Nashakaga ijuru mu isi) kandi rwose ntabwo nashakaga umunyarwanda kuko numvaga ari abakene, nireberaga aba bacuruzi b’abenegihugu ariko tugapfa ko badakijijwe, ariko nkumva nizeye ko nzabona ukijijwe muri bo cyangwa ngo nkamubwiriza kugeza akijijwe.

Gusa naje kwakira ubutumwa bw’abantu banyuranye bambwira ko babonye nashyingiwe, nkabacecekesha kuko natinyaga ko bambwira umunyarwanda uri mu buhungiro kandi ari abakene, naje kujya mu masengesho haje umushyitsi, ninjye munyarwanda wari urimo njyenyine hanyuma uwo mushyitsi aransigarana, ati ufite icyifuzo cyo gushaka, nti “Yego, ariko atari ubu.” Ati iby’igihe simbizi ariko Imana imbwiye ko uzashaka umunyarwanda, ndetse avuka hafi ya RD Congo ariko ni umunyarwanda muzatura mu gihugu cyanyu, muzajya muza Congo mutembereye gusa, natashye narembye, ariko nti ubwo ari Imana ibivuze ni byiza.

Reka mbabwire ukuntu umugabo wanjye yateretewe n ’Imana :
Ubwo yaje kudusanga ku itorero twasengeragaho, cyakora ari umurokore pe, ariko yari umukene, bahita banamugira umudiyakoni, ariko akagira imico myiza pe, twibera aho nk’igihe cy’umwaka, agakunda kuza kudusura mu rugo akadusengera cyane, nkabona umubyeyi wanjye (Mama) aramwishimiye bidasanzwe kurusha abantu bose bandambagije (Kandi nari narasabye Imana ko izamfasha nkabona umugabo ababyeyi bishimira) umunsi 1 ; numva Mama arivugishije ngo “Ari njye ufata umwanzuro uyu musore namushyingira umukobwa wanjye” Twahise dushwana na Mama kuko rwose ntabwo numvaga mukunze urukundo rwo kubana nawe, ahubwo byahise bituma numva nurwo nari mufitiye rushira !

Twahura nkumva simwishimiye, ariko nikomereza gusenga. Imana yaje kuzansura mu nzozi inshuro 2 sinazirondora ariko zanyerekaga ko ariwe tuzabana, mbwira Imana nti ko ntamukunda na gato, niba ari wowe ubishaka koko unshyiremo urukundo rwo kumukunda kuko ari wowe uzi ibyiza bidukwiriye, kandi ubwo umusore yari ataransaba urukundo !

Urukundo rwaje nk’umuriro, noneho yansuhuza nkumva ntamurekura, nyuma yaje kumpamagara ati : “Ndagukunda kandi nifuza ko tuzabana !” Munyumvire ni ukuri uko abarokore batereta. Nta kuvuga cheri, nta shushu, ariko yatinze kurangiza kuvuga ngo musubize nti : “Yego, ariko ureke tuzashyingirirwe mu Rwanda, intama y’Imana, ati nta kibazo.”

Kuko navugaga ko ibihe ari bibi, n’izindi mpamvu nyinshi, hashize iminsi 2, nari ndyamye, numva ijwi rirampagara mu nzozi ngo “Yewe Conso ! Uhora yitegereza umuyaga ntabiba !” Iri jambo riri mu gitabo cy’Umubwiriza 11.4. Narabyutse n’igihunga cyinshi, nshaka umpamagaye ndamubura, bwakeye njya gushaka umusore mubwira ko nemeye araseka aratembagara. Haleluya !

Mu nzozi Uwiteka yarambwiye ngo nkore liste y’ibyo nkeneye, ndayikora mbwira Imana ngo nonese ko wansezeranije kwambara agashema (agatimba), hano turi ntabwo bajya bashyingirwa ntadushema (udutimba) nti ariko ubwo ariko ubyemeye nzambara igitenge, icyifuzo twakijyanye ku bayobozi b’itorero twasengeragamo, maze dusanga Regional yabasuye we yari azi ibyo mu mugi byabaye umunezero ati bana bacu tuzabashyigikira kandi mbemereye ko nzagaruka kubashyingira, mu by’ukuri yavaga kure cyane ariko yemeye ko azigora akagaruka.

Twarabinogeje n’imiryango, mu by’ukuri wari umuryango twiremeye, usibye Mama na dusaza twanjye 2 duto ntawundi nari mfite ariko abana b’Imana ni beza, noneho we (fiancé wanjye) habe n’umwe wo mu muryango we, ubwo baraturanze bihinduka nk’ubukwe, bati Imana ishimwe tugiye kubona uko abantu bashyingirwa. Dimanche (Icyumweru) ikurikira sinagiye gusenga nagiye kurangura amavuta ahantu kure ariko noneho nari boss nambaye kambambiri, ubwo ku rusengero bashyiraho ituro ryo gushyigikira ubukwe ! Mana we, ibintu byose nari nashyize kuri ya liste nasanze babigejeje mu rugo ntangarira Imana cyane !

Hanyuma njya gutumira umu Pasteur umwe wo mu rindi dini wakoranaga n’aba missionaries, ati ese nibwo bukwe buri gutangazwa numvise, ati uziko mfite hano agashema (agatimba) n’ibindi bijyanye nako aba missionaires bazanye bagira ngo bigishe abantu gushyingirwa mu itorero ariko tukabura uwabisaba ! Nimumfashe tuyihe icyubahiro Imana, iratangaje !

Ubwo rero nahise numva mpinze umushyitsi, nsesa urumeza, ayoberwa ibibaye ariko mubwira uburyo Imana yabimbwiye. Arishima arantwerera byiza cyane, abantu baradutwerereye, amafranga, ibiryo, ndumirwa.

Dore umunsi w’ubukwe rero :
Aba Pasteurs hafi ya bose bo mu ntara, abakozi b’ibitaro, abanyarwanda bari hafi na kure bose baraje (Kuko Yesu yari yatubwiye ati ubu bukwe nabuteguye kera mutaravuka nzabwikorera).

Nambaye agashema (agatimba) nk’abandi bageni bose, n’abangaragiye bose bambaye ibikwiriye, twinjiye mu rusengero itorero ryose ryagezemo, mbakubise amaso mpita nuzura Umwuka wera, nibuka ko ndi umugeni ndiyumanganya, usibye abo navuze hejuru hari harimo n’abasirikari n’abandi bayobozi bo mu nzego za Leta.
Hanyuma nk’uko nababwiye Regional niwe waje kudushyingira ati ibi ntitwabyihererana turinginga uyu mukwe n’umugeni, ko batwemerera tukajya gutambagira mu mugi kuri centre, ngo byibura abandi bakobwa bacu bagire ishyari ryiza.

Tukiri mu rusengero, habayeho ituro ryo gushyigikira urugo rushya, baratuye ! Cyane cyane ibikoresho kandi batura babyina, umurongo uba muremure, abanyesoko bava mu isoko bazanye kubyo bacuruza : amabase, indobo, imyenda,…. baraturaaaaa “kubera Imana”.

Tubanza reception (Kwiyakira) cyakora nta fanta zabagayo twakoresheje twa tuntu bita supadipe (Agafu kaba mu dushashi) dushyira mu mabido, ibyo kurya byo byari byose usibye ifiriti kuko nta mavuta y’ubuto abayo.
Turangije rero twagiye mu mutambagiro “Nzajya mwirahira nzajya mwirahira, Yesu we, nzajya mwirahira.”

Wari kugira ngo ni President wa Republic uri gutambagira, hari abantu batumennyeho umuceri nk’agafuka ka 10kg, batwereka ko batwishimiye. Igihe nari nsamye inda y’umwana wa mbere za ntambara zarakomeje, duhungira ahandi hantu kure cyane, hataba ibitaro, igihe cyo kubyara kigera turi aho, reba nyine inda ya mbere nta kujya ku gipimo niba umwana atambamye cyangwa yicaye simbizi, ariko twinginze Imana ngo itube hafi, nagiye kubona mbona umubyazakazi wakoraga mu bitaro by’aho nashyingiriwe ageze aho ngo aje kwaka laissez-passer (Urwandiko rw’inzira), barayimwima arara aho, bukeye inda iramfata bahita bajya kumubaza niba yadufasha ati rwose n’ibikoresho byose ndabifite tubitogotesha ku ziko arambyaza, bukeye baramuhamagara ngo naze afate laissez –passer, Yesu arantangaza !
Twaje kwimukira ahandi hantu, ku itorero ariko ubwo Imana yari imaze kutubwira ko igihe cyo gutaha mu Rwanda kigereje.

Aho handi naho hari ku itorero, Imana iti nimube mugumye aha, mukore umurimo wanjye, mukore n’iyanyu, tuti sawa buriya tuzamara ukwezi kumwe, ariko twahamaze imyaka 3.

Igihe cyarageze, ndibwira mu mutima nti kandi wabona tubaye nk’abisirayeri, abana bacu akaba aribo bazataha mu Rwanda, ndahinga, ntabwo bakoresha isuka, tureza sinongeye kujya gukorera abandi mu mirima kuva nashyingirwa, niyemeje kwibera gature ndavuga ngo muze twiyakire aho gukomeza gutekereza gutaha,

Ariko Imana kudutumaho ngo iraje kudutora, twatashye dutahanye n’abakozi b’Imana bari baje kuvuga ubutumwa bavuye i Bukavu, twagenze n’amaguru hafi icyumweru cyose kugira ngo tugere i Bukavu, baratwakira baduherekeza kuri UNHCR, mu by’ukuri murumva ko twamazeyo imyaka 10.

Ubwo tugeze mu gihugu cy’u Rwanda, Papa yari yaritabye Imana, hanyuma nasanze abo twiganye barageze iyo bigwa mpita numva intege ziracitse ariko nkiri iyo Imana yambwiraga ko nziga, mbonye ndi inyuma cyane niyemeza kuzibera umuhinzi.
Hari mu kwezi kwa Nyakanga 2003, mu kwa 9 amashuri agiye gutangira abantu bati uba usabye ishuri aho wigaga ariko umuyobozi uhari nta muntu w’ino ajya yakira, twiyambaje n’umuzungukazi wari inshuti yo mu rugo ati kereka mbasabiye iyindi section (ishami) kuko hariya ho Directeur ntashobotse, haje kuza umu Pasteur arambwira ngo hogi nguherekeze tujye gusaba uriya mugabo ishuri ,twagezeyo baranyinjiza jyenyine Pasteur asigara hanze namaranye na Directeur nk’isaha anganiriza, angirira impuhwe, byarangiye ampaye ishuri ariko abantu babyemeye ari uko ntangiye kwiga.

Nize imyaka 2, mba ndarangije, nabyaye umwana wa kabiri ndi mu bizamini, ariko mu gihe twari dutegereje resultants (Amanota), habayeho Appel d’offre (Itangazo ry’akazi) ku bitaro by’i Kibogora, maze Imana impa gutsinda ikizamini cy’akazi mbona akazi mu buryo bw’igitangaza !

ISHIMWE RY’UKUNTU IMANA YAMPAYE AKAZI :
Habura iminsi 4 ngo dukore ikizamini cy’ako kazi, umwana ararwara bikomeye njya mu bitaro, ariko Uwiteka atuma umwana w’umunyeshuri ngo ambwire ntuze ko ari ifuhe rya satani kubera agaseke Imana yanteguriye. Nabuze umwanya wo kugira icyo nsoma kubera umwana yararembye cyane, yoroherwa buracya nkora examen, ndavuga ngo ndasoma nijoro, umuriro urabura mu bitaro burinda bucya bari gukoresha amatara ya petrol. Mu gitondo mbyutse mfata igitabo cya PMTCT, nsoma gusa page imwe ya mbere, ndekeraho mpita njya mu kizamini, bari bavuze ko bashaka abantu 8, dukora turi benshi kandi bavuze ko ababona hejuru ya 30/40 muri ecrit aribo bakora interview, njye nabonye 24/40, hari hari n’ababonye 36/40, ariko abakoreshaga examen bakora akanama bemeza ko ufite hejuru ya 20/40 akora interview, Haleluya !
Nagiye gukora interview, bambajije gusa ibibazo bivuye kuri rwa rupapuro nasomye, ikiyongereyeho nuko bambajije ngo uri umukristo ! Nahise mbona 37/40.

Ubwo akazi mba nkabonye gutyo.

Haleluya !
Maze gutsinda ikizamini cy’akazi :

Nasabye Imana nyinginga ngo indinde gukora Maternité cyangwa salle d’operation ! Gusa burya Imana niyo imenya ibidukwiriye birushijeho kuba byiza kuruta ibindi, maze ikaduhitiramo. Ariko ubwo Imana yari yarambwiye ko izampa kwiga kaminuza, ubwo numvaga ngiye gukora igihe gito ntegereje resultants nkigira muri kaminuza, ariko inzira z’Imana zirenze uko twabyibwira.

Ngiye gutangira akazi bati buri wese agomba kunyuzwa muri services zose mu rwego rwo kumenyerezwa, usibye Consolée kuko Docteur ushinzwe Maternité yamusabye !
Resultants zaraje nsanga mfite 4.6/11, nta bourse mfite, nti karabaye ! Ariko nyuma y’imyaka 2 n’igice nkora Maternité basabye abantu bakora Maternité ko bakwiga kujya bafasha muganga ari kubaga, bose barabyanga, numva umutima unyemeza kujya mufasha. Umushara wa mbere wose nawutuye Imana.

Ibitaro byacu, bijya bitanga bourses rimwe na rimwe, ku bantu bamaze kuhakora nibura imyaka 3 kuzamura, ubwo rero baje gukora inama nanjye nari ndi mu banditse basaba kuzajya kwiga, ariko nari ntaruzuza imyaka itatu. Ubwo bafashe abantu bane gusa, ngiye kubaza barambwira ngo sinari nuzuza imyaka 3, banyereka urutonde rurerure rw’abantu batafashe, batanze rapport ku bazungu bafasha ibitaro, bati nimwongereho umuntu umwe basanga bakeneye umu anesthesiste, bati twafata nde mubona wahita amenyera salle d’operation, bati Consolée wo muri Maternité yamenyereye ibagiro, ng’uko uko naje kwiga KHI (ubu yabaye UR-CMHS).

Nari nahize ko n’ubundi nimpembwa salaire ya mbere (umushahara) ndangije KHI, nzayitura Imana, kandi nabyo yarabinshoboje.

Yesu yongere ashimwe !

Reka nsimbuke mbabwire uko nagiye muri USA :
Ubwo twiga KHI, hari amasomo twigeze twiga ya Theologie. Tugeze ku isomo rya missiology, ndota ndi mu gihugu kigabanijemo ibice bibiri hari amajyepfo n’amajyaruguru, ngo ndibwira ngo menya ari muri Koreya kuko bavuga ngo Koreya y’amajyepfo n’iy’amajyaruguru.

Hanyuma naje kubwira uwatwigishaga ibyo narose, arambwira ngo nzajya mu hanze y’u Rwanda, nugerayo ntuzabure kuvuga ubutumwa bwiza bwa Yesu Kristo, icyo gihe ndumva hari muri 2011. Haje kuza umwana mu bitaro byacu, yaraboze igufwa ry’akaboko, amara umwaka mu bitaro byacu, aza gusabirwa ubufasha muri USA, ngo bakure igufwa mu kaguru barishyire mu kaboko.

Narose numva ijwi rimbwira ngo ni wowe uzamuherekeza. Hanyuma babwira nyina bati hitamo uzaherekeza umwana wawe, ati nta wundi ni wa mukobwa witwa Consolée, ukora mu ibagiro. Umuzungu wafashaga uwo mwana aza kumbaza niba nabyemera ? Ndabyemera.
Nibwo twuriye indege muri December (ukuboza) 2015 tugenda twumva ukuntu Yesu agira neza.

Nari narabwiye Imana ngo niba uru rugendo nta munezero yo izarukuramo izandeke sinjyeyo, bucya ngenda niho yambwiye mission impaye, Haleluya ! Ntababeshye, mu ndege nagendaga nivugisha pe, mbega byandenze, nkavuga Imana, nkayishima.

Icyo ntabura kubabwira ni uko ngeze USA aho mu nzu twabagamo Uwiteka yanzaniyemo abantu baturuka Nepal batazi Imana batazi Yesu, baje batwaye Imana yabo muri valise. Nagerageje kubabwiriza ibya Yesu n’ubwo nabonaga batabyumvaga neza.

Ndashima Imana ko yabanye natwe muri USA, ikatujyana ikatugezayo amahoro kandi yatugaruye amahoro.

Ikindi nababwira ni uko mbatizwa mu Mwuka Wera, nahawe impano yo kuvuga mu ndimi kandi ndacyazivuga kugeza n’ubu, iyerekwa ryanjye riba mu nzozi, numva abantu bambwira ngo nzi guhugura abandi nkoresheje ijambo ry’Imana…

Iyo ntekereje ineza y’Imana ngira ubwoba ,kuko mbona ngira amakosa menshi, kandi yo inyitaho cyane. Mba numva ntinye Imana kandi numva mparanira kuyubaha no kuyubahisha,uko nshobojwe.

Nk’umuntu hari igihe njya ngira intege nke ntizabura, ariko sindagira ibyago byo kuzitindamo, wenda ngo mbe natinyuka kumara icyumweru kimwe ntagize igihe kimbitse cyo kwegerana n’Imana (Nko kwiyiriza,…) kuko mpita numva nabaye umurwayi.

Mu rugendo rujya mu ijuru, mfashwa cyane no gusenga mu buryo bunyuranye, nkunda gusoma Bibiliya n’ibindi bitabo bivuga Imana, ibyo biramfasha cyane.
Umuririmbyi wa 149 niwe wavuze kuby’Urukundo rw’Imana ko ntawarondora uko rungana no kwandika ibyarwo ntabwo twabirangiza.

Ikindi ntabura kubabwira, ni uko ku bijyanye n’umurimo w’Imana ubu ndi umukristo muri ADEPR paruwase Tyazo/Nyamasheke, kandi ndi umuririmbyi muri chorale Silowamu ku mudugudu wa Tyazo.

Umugabo nawe yaje gukomeza kwiga arangiza licence muri Santé Publique, ariko yabyize aniga amasomo ya Bibiliya yitwa ETD, ubu akaba nawe ari umupasteur muri ADEPR.

Zaburi 125:2 “Nkuko imisozi igose i Yerusalemu, niko Uwiteka agose abantu be uhereye none ukageza iteka ryose”

Uwiteka agota abamwubaha akabarinda, niba waravuganye nayo, tuza ukomere umutima, Imana izakugirira neza.

Izagutabara ku mugaragaro nk’uko yantabaye, iguhaze umunezero.

Amen.

Ndumva naba mpiniye aha,
Yesu abahe umugisha !

Ubuhamya bwa NIYIGABA Consolee

Twebwe abasiganirwa Aho dutegekwa Twiteguye ururembo Tuza gutahamo … (400 Gushimisha Imana)

Mbese ko tuvuga ko turi abagenzi mu isi, twizera neza ko koko ijuru ririho ? Ikibihamya ni uko mu ijuru havuye Yesu kandi yanasubirayo akavuga ko agiye kudutegurira aho tuzabana nawe. Intumwa kandi nazo zabonye Yesu azamuka, arenga bakimureba, abo kandi bari baranahishuriwe Yesu yambaye ubwiza ubwo Mose na Eliya bari babagendereye. Birakwiye buri gihe ko tugira uguterana kwera, kuko tuba tuje kumva amabwiriza y’iwacu.

Ubuhamya: Iyumvire impamvu abana b’Abapasiteri usanga bigira ibyigenge bakajya mu byaha, Ubuhamya bwa Ev. KWIZERA Emmanuel

Heb.12:18-24

” Ntimwegereye wa musozi ubasha gukorwaho wakaga umuriro, cyangwa ngo mwegere igicu n’umwijima w’icuraburindi n’umuyaga w’ishuheri, … Ahubwo mwegereye umusozi wa Siyoni n’ururembo rw’Imana ihoraho, ari rwo Yerusalemu yo mu ijuru, kandi mwegereye iteraniro ry’abamarayika batabarika, n’Itorero ry’abana b’impfura banditswe mu ijuru, mwegereye n’Imana umucamanza wa bose n’imyuka y’abakiranutsi batunganijwe rwose. Mwegereye na Yesu umuhuza w’isezerano rishya, mwegereye n’amaraso aminjagirwa, avuga ibyiza kurusha aya Abeli. ”

Ijuru tuzabamo ntabwo ari irizabaho nyuma ahubwo ririho, hariyo Imana, Ibizima, Abaserafi, imfura Yesu yazukanye. Ubwo dufite ibyo byiringiro, ntibidukwiye kwiganyira iby’ibihe kuko dufite Data utumenyera ibyo byose ! Matayo 6:31 “Nuko ntimukiganyire mugira ngo ’Tuzarya iki ?’ Cyangwa ngo ’Tuzanywa iki ?’ Cyangwa ngo ’Tuzambara iki ?’. Iri ni itangazo rireba abana b’Imana, si ibya bose.

Imana yagaragaje ko ari Umubyeyi rwose, cyane ku Bisiraheli mu butayu. Imana yifitiye icyizere niyo mpamvu yatubwiye ngo dusabe ibyo kurya byacu by’umunsi, ifite ibya buri munsi byihariye. Data azi ibidukwiriye, bakundwa si ibyacu kwiganyira iby’ino aha.

Heb.11:13-16

” Abo bose bapfuye bacyizera batarahabwa ibyasezeranijwe, ahubwo babiroraga biri kure cyane bakabyishimira, bakavuga ko ari abashyitsi n’abimukira mu isi. Abavuga batyo baba berekana yuko bashaka gakondo. Iyo baba barakumbuye iyo bavuyemo, baba barabonye uburyo bwo gusubirayo. Ariko noneho barashaka gakondo irusha icyo gihugu kuba cyiza, ari yo yo mu ijuru. Ni cyo gituma Imana idakorwa n’isoni zo kwitwa Imana yabo, kuko yabiteguriye umudugudu.”
Gakondo twavuyemo tuba tugituranye nayo, gusubirayo biroroshye, ijuru naryo riri hafi yacu, ni ahacu guhitamo. Abantu nubwo baba basuzuguritse, ariko bashobora kuba abadateye isoni Imana kubw’ukwizera kwabo, halleluya !

Heb.11:35-40

“Abagore bahabwaga abo bapfushije bazutse. Abandi bakicishwa inkoni ntibemere kurokorwa, kugira ngo bahabwe kuzuka kurushaho kuba kwiza. Abandi bakageragereshwa gushinyagurirwa no gukubitwa ibiboko, ndetse no kubohwa no gushyirwa mu mazu y’imbohe. Bicishwaga amabuye bagakerezwa inkerezo, bakageragezwa bakicishwa inkota, bakazerera bambaye impu z’intama n’iz’ihene, banyazwe byose, bakababazwa bakagirirwa nabi. Yemwe, n’isi ntiyari ikwiriye ko bayibamo ! Bazereraga mu mashyamba no mu bihanamanga, no mu mavumo no mu masenga. Abo bose nubwo bamaze guhamywa neza ku bwo kwizera kwabo, nyamara ntibahabwa ibyasezeranijwe kuko Imana yatugambiriye ikirushaho kuba cyiza, kugira ngo abo badatunganywa rwose tutari kumwe. ”

Aba bose ni abahamya b’Ubwami, kandi nabo baratugose. Yobu yubahaga Imana, Imana ikamwiratira ko ayubaha nubwo yakira nubwo yakena. Satani we yibwiraga ko ayubaha kubw’ibyo atunze, Imana imwemerera kubikoraho ariko asanga yibeshye ; noneho ahabwa no gukora ku mubiri we arahumana rwose pe… (hari ababeshya ko umuntu w’Imana adahura n’ibibazo by’indwara n’ubukene !), kugera aho n’umugore we amuhinduka ariko ahamya ko naho yapfa azapfa akiyiringiye, ahamya ko na nyuma yo kubora azabona Imana ye.

Pawulo yari intwari, ntiyacaga iruhande rw’ukuri. Gal.6:14 (Ariko jyeweho sinkiratana ikindi, keretse umusaraba w’Umwami wacu Yesu Kristo wateye ko iby’isi bimbera nk’ibibambwe, nanjye nkabera iby’isi nk’ubambwe.)

Hari ibyo Paulo yabambye :

2Abakorinto 11:21… ” Ibyerekeye ibyo bigawa, ni koko twabigizemo intege icyo undi wese ahangara gukora (ibi mbivuze nk’umupfu) nanjye nagihangara. Mbese abo si Abaheburayo ? Nanjye ni uko. Si Abisirayeli ? Nanjye ni uko. Si urubyaro rwa Aburahamu ? Nanjye ni uko. Si abakozi ba Kristo bagabura ibye ? (Noneho ndavuga nk’umusazi), ndabarusha. Mbarusha mu mihati, mbarusha gushyirwa mu mazu y’imbohe, mbarusha cyane gukubitwa birenze urugero : kenshi nari mu kaga k’urupfu. … mu miruho n’imihati. Mba maso kenshi, ngira inzara n’inyota, nirirwa ubusa kenshi, nicwa n’imbeho, nambara ubusa”.

Paulo yari yarabambye kamere y’amoko. Ntawe ukwiye kwirata icyo aricyo, nubwo yari yarize amashuri akomeye yo mu Bugiriki kandi nabyo ntiyabyirase, akorera urukiko rw’ikirenga, agira irangamuntu y’umuroma, yari umuyahudi w’umwimerere, ariko ibyo byose ntibyagira agaciro ; agakubitwa azira Kristo kandi nta muroma byari byemewe ko akubitwa ; ariyoroshya kubwa Kristo ! Dufite ibyo twakwirata, ariko Yesu yaradufashe, halleluya !

Paulo yatangaga ibye kugira ngo akorere Kristo ntiyite ku mashuri ye akadoda amahema ! Aho waba uri hose, ibiro wakwicaramo byose, umenye ko Kristo arusha abo ukorera gukomera.

Daniel yari umunyepolitiki ukomeye ariko arakiranuka ntiyabonekwaho n’ikosa na rimwe. Obadia nawe yubahaga Imana nubwo yakoraga imirimo kwa Yezebeli ahari ibigirwamana magana inani. Niwe wahishe abahanuzi bagiye kwicwa akabagaburira. Umupfakazi we niwe wa mugore wagiye kwa Elisa atabaza kubera amadeni, Imana iramutabara, halleluya ! Ntuzitwaze shobuja n’ibindi ibyo aribyo byose wakoramo ngo ukiranirwe, ntibikabe.
Kornelio yari umusirikare ufite umutwe w’abasirikare ayoboye, ariko agakiranuka. Ubwiza bwawe ntibwakakubereye icyo kwiratwa ngo kirute ubugingo bwawe, nyamara Esther yubashye Imana !

2Abakorinto 6:14

“Ntimwifatanye n’abatizera mudahwanye. Mbese gukiranuka no gukiranirwa byafatanya bite ? Cyangwa umucyo n’umwijima byabana bite ? Kandi Kristo ahuriye he na Beliyali, cyangwa uwizera n’utizera bafitanye mugabane ki ? Mbese urusengero rw’Imana rwahuza rute n’ibishushanyo bisengwa, ko turi urusengero rw’Imana ihoraho ? Nk’uko Imana yabivuze iti”Nzatura muri bo ngendere muri bo, Nzaba Imana yabo na bo bazaba ubwoko bwanjye. Nuko muve hagati ya ba bandi, Mwitandukanye ni ko Uwiteka avuga, Kandi ntimugakore ku kintu gihumanye. Nanjye nzabakira, Kandi nzababera So, Namwe muzambere abahungu n’abakobwa, Ni ko Uwiteka Ushoborabyose avuga. ”

Ubwo turi ab’ijuru twitandukanye n’isi !

Korari Besalel ikomeje imyiteguro y’igitaramo, izapfunduriramo abakunzi bayo agaseke gategerejwe na benshi, aho izaba imurika umuzingo wayo wa kabiri w’amashusho (DVD). Ni mu gitaramo giteganijwe kuri iki cyumweru tariki ya 14 Mutarama 2018, cyatumiwemo korali Siyoni, kuva muri ADEPR Jenda.

Kuri ubu hasigaye ibarirwa ku ntoki korari Besalel ibarizwa mu itorero rya ADEPR Murambi mu Karere ka Kicukiro mu mujyi wa Kigali igakora igitaramo gikomeye imaze iminsi itegura, ari nabwo izamurika Alubumu yabo ya kabiri y’indirimbo z’amashusho (Album DVD).

Iki giterane kizamara iminsi itatu kizatangira kuwa gatanu tariki 12 Mutarama gisozwe ku cyumweru tariki 14 Mutarama 2018 ari nawo munsi uzaberamo umuhango nyamukuru wo kumurika uyu muzingo.

Mu kiganiro na Bwana Mihigo Theodore uyoboye Korari Besalel muri iki gihe yavuze ko imyiteguro y’iki gitaramo igeze kure kandi bizeye neza ko Imana izabana nabo nk’uko basanzwe babibona mu bitaramo bategura. Ati’’ _Dusanzwe dutegura ibiterane Imana ikabana natwe, turimo gutegura ibyo dushoboye twizeye ko Imana izadufasha igahembura imitima y’abazitabira iki giterane kuruta n’uko tubyifuza_.’’

Uretse Korari Besaleli izataramira abakunzi b’ibihangano byayo byagiye bikora ku mitima ya benshi, muri iki giterane hazaba hari na Korari Siyoni ya ADEPR Jenda mu karere ka Nyabihu nayo imaze kwigarurira imitima ya benshi hirya no hino mu gihugu. Hazaba hari kandi na Korari zisanzwe zikorera ivugabutumwa ku mudugudu wa ADEPR-Murambi ari zo Gibeyoni n’Amahoro ndetse n’abigisha b’Ijambo ry’Imana.

Korari Besaleli yamenyekanye cyane mu ndirimbo bise Golgotha yakunzwe n’abatari bake ariko na nyuma ikomeza kugeza ku bakunzi bayo ibihangano bitandukanye, aho nk’umwaka ushize bashyize hanze Alubumu y’amajwi yari igizwe n’indirimbo 15.

Iyi Alubumu y’amashusho bitegura gushyira ku mugaragaro izaba igizwe n’indirimbo 12 zikubiyemo iz’ikinyarwanda, icyongereza n’igiswahili.

*Gahunda y’igiterane muri rusange*:

Kuwa 5 le 12/1/2018 : Igiterane kizatangira sa kumi n’imwe kugeza sa mbiri z’umugoroba_ (17h00-20h00)

Kuwa 6 le 13/1/2018 : Kizatangira sa cyenda z’amanywa ari nabwo Korari Siyoni izaba yahageze, gisozwe sa moya n’igice z’umugoroba_ (15h00-19h30)

Ku cyumweru : Mbere ya sa sita na nyuma ya sita kizatangira sa munani zuzuye kugeza sa kumi n’ebyiri n’igice_ (14h00-19h30)

Mu rwego rwo gufasha abatuye umujyi wa Kigali gutangira neza umwaka wa 2018 bari mu bihe byiza mu buryo bw’umwuka, Itorero Methodiste Libre mu Rwanda, paruwasi  ya Batsinda ,ryabateguriye igiterane cy’akataraboneka kuri iki cyumweru tariki ya 14/01/2018.

Ni murwego rwo gushimira Imana ko basoje umwaka wa 2017  kandi bakaba baratangiye 2018 amahoro, itorero Methodiste libre, paruwasi ya Batsinda ryahisemo kwinjira mu mwaka mushya ingamba nshya n’imikorere ihamye yo kwagura ivugabutumwa.

Kuri iki cyumweru, tariki ya 14 Mutarama 2018, iri torero rikaba ryarateguye igiterane cyo gushima Imana. Iki giterane kiteguwe mu buryo bushimishije ku buryo nta muntu n’umwe uzakitabira uzicuza kukibonekamo,kizatangira saa tatu zuzuye za mu gitondo,I Batsinda aho bita mu IBERESHI KU MINARA kikazakomeza na nyuma ya saa sita.

Reverend Pasteur Itangishaka Emmanuel,umushumba wa EMLR paroisse ya Batsinda aganira n’itangazamakuru yavuze komuri iki giterane hateguwe abakozi b’Imana basizwe bazagabura ijambo ry’Imana ,bagasengera abarwayi  ndetse n’ibyifuzo.

Past Pascal Habimana azavuga ubutumwa bwiza muri iki giterane

Yagize ati,”Muri iki giterane twatekereje ku bakozi b’Imana bafite ijambo barimo nka Pastor Habimana Bernard kuva muri ADEPR paroisse ya Gikondo, Reverend Pastor Benjamin Nkusi kuva kuri Cathedral ya EMLR I Gikondo, Pastor Pascal Habimana kuva muri ADEPR paroisse ya Kacyiru ndetse na Reverend Itangishaka Emmanuel uyoboye iyi paruwasi ya EMLR Batsinda.”

Hanatekerejwe kandi ku murimo wo kuramya no guhimbaza Imana aho korali zikunzwe cyane muri iri torero nka Narada izaturuka ku cyicaro cya EMLR paruwasi ya Kicukiro, Korali zo muri paruwasi ya Batsinda arizo, “Elen, Yakini ndetse na korali Abahagurutse”.

Si abo abavugabutumwa ndetse n’amakorali gusa batekerejweho, kuko hanatumiwe n’umuhanzi ku giti cye uzaturuka mu gihugu cy’abaturanyi aricyo cy’Uburundi uzwi ku mazina ya Samson.

Ubuyobozi bw’iyi paruwasi, bukaba burarikira abantu bose kuzaza kwifatanya nabo muri ibi bihe byiza bitangira umwaka wa 2018.